Müsəlman qadınlara qarşı mütəşəkkil Hindu ekstremist zorakılığı var
"İQNA", "Ərəbi 21"-ə istinadən xəbər verir ki, Türkiyənin "İnsamer" qəzeti irqçi əhali siyasətindən tutmuş sosial şəbəkələrdəki hədə-qorxu kampaniyalarına, hicabın qadağan edilməsinə və müsəlman qadınlara qarşı cinsi zorakılığa qədər Hindistan müsəlmanlarına, xüsusilə də qadınlara qarşı təzyiqlərdən bəhs edən xəbər dərc edib.
Qəzet Hindistanın əhalisinə görə Çindən sonra ikinci ən böyük ölkə olduğunu və dil, din və mədəniyyət baxımından bir-birindən fərqli insanlar qrupuna sahib olduğunu bildirib.
Uzun illər Avropa müstəmləkəçiliyindən sonra Hindistan 1947-ci ildə Hindistan Respublikası adı ilə müstəqilliyini əldə etdi. O dövrdə hindular və müsəlmanların razılaşdığı müstəqillik mübarizəsində millətçi ideologiya mühüm rol oynadı. Lakin ingilislərin bölgədən çəkilməsi ilə fikir ayrılıqları ölkənin iki ölkəyə bölünməsi ilə sona çatdı. Hinduların çoxluq təşkil etdiyi Hindistan və müsəlmanların çoxluq təşkil etdiyi Pakistan.
Hazırda Hindistanda təxminən 180 milyon müsəlman yaşayır ki, bu da ümumi əhalinin 14,2%-ni təşkil edir. 2014-cü ildə ekstremist hindu millətçi partiyası Bharatiya Janata hakimiyyətə gəldikdən sonra ölkədə İslam əleyhinə fəaliyyətlərdə xeyli artım müşahidə olunub. Xüsusən də 2019-cu ildə keçirilən son seçkidə böyük qələbə qazandıqdan sonra, partiyanın müsəlmanlara qarşı repressiya və hədə-qorxu siyasətinin gücləndiyi vaxt müsəlman qadınlar, daha çox hədəfə çevrildi.
Hindu ekstremistləri hətta müsəlman tələbələri hicablarını açmağa razı salmaq üçün bəzi məktəblərdə "inandırma otağı" adlandırdıqları otaq da yaradıblar. Hindistan hökumətinin hazırda orta məktəblərdə tətbiq etməyə çalışdığı hicabın qadağan edilməsi qərarı gələcəkdə ölkənin bütün məktəbləri və digər ictimai yerlərə də şamil oluna bilər.
Qəzet Hindistanda müsəlman qadınlara qarşı ciddi və qəbuledilməz təzyiqlər, o cümlədən təcavüz hallarının artması barədə xəbərdarlıq edib.
Qadınlara qarşı zorakılıq müsəlman qadınların şəxsiyyətini alçaltmaq və onların şəxsiyyətinə xələl gətirmək kimi sistemli siyasətin nəticəsidir. O da aydındır ki, bu siyasətlərin və digər çirkin əməllərin hədəfi Hindistanın bütün müsəlman icmasıdır.
